آنه العقيله يا يزيد او لا تحاچيني أفني الأرض لو للسما بس ترتفع عيني هاي آنه زينب=هاي آنه زينب لا تعتقد لو أوگف اگبالك سبيّه يعني أصير ابرحمتك يبن الدَعِيّه ما همني لا إنته و لا كل آل أميّه و آنه العقيله بت علي حامي الحَميّه عودي علي او تدري علي شيْسوي لو يغضب=و آنه مثل طبعه او حذاري من غضب زيْنب هاي آنه زينب=هاي آنه زينب او لو دهْري خان او وگّفِتْني بين لرْجال ما مال عزمي حتى لو منّي الظهر مال او لو طوّگِتْني يا يزيد ابطوگ لحْبال ما هزْني او گِلّي الحبل شيْهز بلجْبال ؟ عزمي ثبت و ابمجلسك چنّي جبل راسي=زينب أنه او رغم اليسُر ما هبّطت راسي هاي آنه زينب=هاي آنه زينب او لو جسْم أخويه بالحوافر صدره ينداس او ذاك العمَد من كافلي لو صوّب الراس لا تعتقد راحو هَلي او تشهدلي الناس زينب أنه و اليوم أصير احسين او عبّاس بين الخلايق بالكرامه مرتفع صيتي=متورّثه طبْع اخوتي او من عدها شخصيتي هاي آنه زينب=هاي آنه زينب عار اسمك او مهما تحاول بينه ميْفيد او مهما تحاول خيبتك بالأزمنه اتزيد او هاذي السياط او هالسلاسل بيدي و الگيد كلها تنادي : لعْنَة الله اعليك ييْزيد ما تگدر او مهما تحاول گدرك اتصونه=لن ألله خالق طينتك من شِجْره ملعونه هاي آنه زينب=هاي آنه زينب او لو كِل هَلي راحو ذبح و احسين لو مات خالد ذكرْهم للحشر و ايموت هيهات و أنه إذا أرد اعْدمك يا داني الذات أطْبگ على سبعه الأرض سبعه السماوات (و اللّهِ لن يمحوا ذكرنا ) الظالم ابْجوره=نور الله إحنه او للأبد ما ينطفي نوره هاي آنه زينب=هاي آنه زينب ما أختشي منّك و لا أحسب إلك راي او لو عَشْره منّك تجتمع هم تخسه تدناي لاچن زماني و النصيب او جور دنياي خلّه مثل شخْصك يَوَسْفه يحچي اوياي هذا الأمر ما چنْت احسبه حتى بحْلامي=تتسيّد الگوم الذي محسوبه خِدّامي هاي آنه زينب=هاي آنه زينب