زينب تنعى أباها علياً ياللي عشت بحماك = للگبر خذني إوياك زينب يبويه إتنادي عشت إبهنه إو محجوبه = وإمدلله بوجودك وإمخدره ومهيوبه = ومرتفع راسي إبزودك إو لا خايفه إو مرعوبه = إو سور ألأمان إحدودك إبفگدك طحت مصيوبه = وريعي إنگطع من جودك صوبني سيف إعداك = من خضبك بدماك زينب يبويه إتنادي والجدّي المختار = روحي تجر الحسره وضلع أُمي بالسمار = أهجس إبضلعي الكسره والسگط باب الدار = كسّر إبصدري العبره چنت أطفي بيك النار = من گلبي يسعر جمره وزينب إلما تسلاك = چيف البصر بعداك زينب يبويه إتنادي خدري المحصن چان = بإسمك يسر إسم ألله وأرعه إبعظيم الشان = ولا چنت أعرف الذله وإتهدم الكيوان = عگبك يسيف المله وإتغير العنوان = والخدر ينكف ظله يمسير ألأفلاك = روح القدس ينعاك زينب يبويه إتنادي حط بيّه دهري إصواب = ضامي وتگص الشفره مثلك يداحي الباب = أهجس إبراسي الطبره إو يتجادح إو لهّاب = فگدك إبگلبي صبره وإنحمس چبدي إو ذاب = يا آية ألله الكبره ما ينحمل فرگاك = والگلب ما ينساك زينب يبويه إتنادي