زينب: عليكم حالي متمرض وبالي=ولا جف الجفن مقروح وبالي أخذتون العگل مني وبالي=اوجرح گلبي انفتح صبح ومسيه العباس: گصدت المشرعة وحامل گربتي=واحس كل خطوه اتباعد گربتي يزينب يابعد أهلي وگربتي=أنا شوفيت لچ انتي الوفيه زينب: محد غيرك وفي ابصفاته غيره= البشر من زودك اخذت مني غيره اذا مو ابن ابويه منهو غيره=يرهم له اسم ابو النوماس اخيه العباس: أنا الچف إلي دگت لچ وعد لچ=أفز لچ يختي بالمحمل وعدلچ بس احسابي الطلع دوني وعدلچ=تمشين ابسبي وعذري اشبديه زينب: يعباس اتجه ضعنك مناحي=وحمام الدوح يشبهّا مناحي يميت عوّد اوگلي مناحي=ترضى اسياطهم تنزل عليه العباس: أبد أرضى وحگ إلي هدانه=صحيح أن ساكت وهادن هدانه يزينب هذا انا اگبالچ هدانه=بس ابراسي فوگ السمهريه زينب: أشوفك يابعد اهلي وجلدتي=عليك اتجلد اشنفعت جلدتي كأنك تشعر ابضربة جلدتي=وچنها عيونك اليسرى عليه العباس: ينشميه اختي عشنا ومنفصلنا=حبايب من اصلنا ومنفصلنا ربيع افصول خوّه ومنفصلنا=آنه وياچ جينا الغاضريه زينب: من اول ليله وانصبنا خيمها=كلت اني الإخت وانته خيمها وخيمها الحزن تالي خيمها=تقبل ادخل امجلس هديه العباس: أبدما اقبل ادخولچ عليزيد=واحاچي النوح يانوحي عليزيد علي المشتوم والشاتم علي ايزيد=صعبه اشلون اقبلها يخيه زينب: جبل لجفون والخدين سفحه=اودموع العين شلالين سفحه راس ابن امي ابچي اشلون سفحه=مكسور الثغر بيد الدعيه العباس: عزيزه يختي عندي وحبابه=أريد اگرب لراسچ واحب بابه بالمجلس نزل لچ وحي ابابه=وأبرزتي الخطابه الهاشميه