عمري من غيرك شتات = والله ماحس بالحياة ظامي آنا المَنْهَلَك = يا التجيب اليسألك (١) انتَ عادل في قضائك = تعفو لكن ما تِحِيد ليش في حكمك عليَّه = يا أبو الأكبر شديد ؟ روحي متهنيه ابجوارك = والجسد عنَّك بعيد ! خذني كلِّي كِلِّي يمَّك = والله غيرك ما أريد حَقِّق أحلامي ورجاي = يا سبب حزني ورضاي تدري حلمي أوصلك = يا التجيب اليسألك (٢) تِدْري كِلْمَنْ عَنَّه رُوحَه = تِبْتعد ميِّت يِصِير كيف أعيش وروحي عندك = جاوب احساسي المرير كل عسر فالدِّنيا أدري = سَيِّدِي عندك يسير والكريم المثلك أجزم = ما يِرِد سائل فقير لا تِرِد هذي الچفوف = أَرَد أشم عطر الطُّفُوف شوقي ما يُوصَف إِلَك = يا التجيب اليسألك (٣) رَيتَ اوَاسي في مسيري = اختك أم المكرُمَات زينب الحرة الأبيه = الصَّابِرَه في النَّائِبات كانت ابكل خطوه تهدم = غاية احلام الطُغاة رسمت ابأقدس مسيره = خارِطَةْ فوز ونجاة وخارطة شوق وحنين = لكْ يبن طه الأمين بِيها كل عاشق سَلَك = يا التجيب اليسألك (٤) المشي في (كربلائك) = مو فقط يروي الشعور كم هدف في طَيَّه حامل = ما تِوَفِّيهِ السُّطُور كل أحاسيسي تِنَادِي : = والله هِنْيالَه اليِزُور من كثر شوقي وهيامي = أغبط أسراب الطّيور التِطِير اعله القِباب = واغبط اعليك السَّحاب الِّي دَمْعَهْ بَلَّلَك = ياالتجيب اليسألك (٥) مِنْ يِجِن ليل اشتياقي = هذا طبعي من زمان أقرا بآهاتي الزياره = من مفاتيح الجنان عيني تتمنى تِنَاظر = نظره تسقيها الحنان نظره وحده في ضَرِيحَك = تمنح العاشق أمَان يا أمان المُستجير = عقلي باسمك يستنير يدفع أوهام الحَلَك = يا التجيب اليسألك (٦) غاية الغايات قُربَك = هذي صرخات الحَنِين تعتلي كل لحظه صرخه = من لهاة العاشقين لَبَّت الوادم نِدائك = وآنا محروم وحزين مستعد بس للزياره = أفدي كل غالي وثمين تنمحي كل الجروح = لو مناراتك تلوح والي مازار اشْمَلَك ؟ = يا التجيب اليسألك