دخول السبايا و سؤال سهل الساعدي بدروازة الشّام اوقفت ذيج الخواتين=و الشّام مرتجّه واهاليها معيدين كل الخلايق لابسين اجديد لثياب=ولا بقى من اهل البلد شيخٍ ولا شاب و ال الرسول منكّسين الرّوس بالباب=و زين لعباد ايصيح وين الهاشميّين بالأمس حولي من بني هاشم صناديد=فرسان كلهم والحرايب عندهم عيد و اليوم اعالج فوق ناقه ابجامعه و قيد=القيد حز ساقي و غلهم حز ليدين و أقبل سهل و النّاس تتراكض بلدروب=يقولون راس الخارجي في وين منصوب شاف الاسواق معطلّه والكون مقلوب=والكل ينادي جوا سبايا الخارجيّين وعاين يتامي فوق هزّل في بجا ونوح=ومن الضّرب والسّير ماظلّت لهم روح وحده تنادي عقب عزّي وين انا اروح=بيني وبين حجاب صوني فرّق البين سلّم عليها و قال يلّي عْلَى المطيّه=و الله حنينج زيّد احزاني عليّه يخسون اهل هالبلد منتي خارجيّه=جنّج يمسبيّه من اشيوخ لمسلمين قالت أنا جدّي النّبي صفوة الجبّار=وابوي حيدر قاسم الجنّه مع النّار و مكسورة الأضلاع شمّامة المختار=أمّي وانا زينب واخوتي الحسن وحسين قلها الحسَب والنّسب هلّي تذكرينه=معروف و ان صح الخبر جدّج نبينا لكن يزينب وين خدر اليوصفونه=تركبين حسره فوق ناقه واخوتج وين قالت لَتسألني و عاين روس لرماح=ذاك الخدر ياسهل عنّي قوّض و راح و عمود خيمتنا حسين اتزلزل و طاح=بديار غربه يا سهل ضيّعني حسين و انجان عندك يا سهل شيٍ من المال=هالرّجس خلّه ايميل عنّا ابروس لرجال قلّه يصد ابروس اهلنا عن هلعيال=والله اختزينا وذابت قلوب النساوين للرّجس راح يناشده بالله و رسوله=و المال سلّم له و عبراته هموله تمرّد الطّاغي ورد نصب روس الحموله=بين المحامل والخلق عكّف الصّوبين ما بين ماهي فوق ناقه اتصعِّد انفاس=لن الرّجس جاها وكل جانب نصب راس و اقبالها راس لحسين و راس عبّاس=صاحت يخويه هالمصايب جتني منين